વઢવાણના મહિલા મંડળના ગૃહઉદ્યોગને મુખ્યમંત્રીએ બિરદાવ્યો:ભૂપેન્દ્ર પટેલે શુભેચ્છા પત્ર મોકલ્યો; કલેક્ટર જી.એચ. સોલંકીએ પણ અભિનંદન પાઠવ્યાં

વઢવાણ અને આસપાસની મહિલાઓને ગૃહઉદ્યોગથી આત્મનિર્ભર બનાવતા ‘શ્રી વર્ધમાન ગૃહ ઉદ્યોગ મહિલા મંડળ’ની કામગીરીને મુખ્યમંત્રી ભૂપેન્દ્ર પટેલ અને સુરેન્દ્રનગરના કલેક્ટર જી.એચ. સોલંકીએ બિરદાવી છે. બંનેએ અલગ-અલગ શુભેચ્છા પત્ર મોકલી મંડળ સાથે જોડાયેલી મહિલાઓને પ્રોત્સાહિત કરી છે. મુખ્યમંત્રી ભૂપેન્દ્ર પટેલે પત્રમાં જણાવ્યું કે સ્થાનિક મહિલાઓને ગૃહઉદ્યોગથી આત્મનિર્ભર બનાવવાનું મંડળનું કામ સરાહનીય છે. મંડળ ખાખરા, પાપડ, અથાણાં અને ફરસાણ બનાવે છે. આ ઉત્પાદનોનું મોટા પાયે ઉત્પાદન અને વેચાણ થાય છે. મંડળની કામગીરીથી 50થી વધુ સ્થાનિક મહિલાઓને સીધી રોજગારી મળી છે. મુખ્યમંત્રીએ તેને મહિલા સશક્તિકરણનું ઉદાહરણ ગણાવ્યું. તેમણે કહ્યું કે વડાપ્રધાન નરેન્દ્રભાઈ મોદીના ‘Women-led Development’ એટલે કે મહિલા નેતૃત્વ હેઠળના વિકાસના વિઝનને સાકાર કરવામાં આવા ગૃહઉદ્યોગો યોગદાન આપે છે. તે મહિલાઓને આર્થિક રીતે સક્ષમ બનાવવા, જીવનધોરણ સુધારવા અને સમાજના વિકાસમાં મદદરૂપ થાય છે.