વલસાડમાં ધારાસભ્ય ભરત પટેલે જેટી પર મરામત કામગીરીનું નિરીક્ષણ કર્યું:ઔરંગા નદી કિનારે ગણેશ વિસર્જનની તૈયારીઓ માટે ચાલી રહી છે કામગીરી

વલસાડમાં ઔરંગા નદીના કિનારે આવેલી જેટી પર ગણેશજીની પ્રતિમાના વિસર્જન માટે તૈયારીઓ ચાલી રહી છે. આ તૈયારીઓ અને રસ્તાની મરામત કામગીરીનું વલસાડના ધારાસભ્ય ભરતભાઈ પટેલે સ્થળ પર નિરીક્ષણ કર્યું હતું. સ્થાનિક નગરપાલિકા સભ્યો, તાલુકા પંચાયત સભ્યો અને સરપંચો દ્વારા ગણપતિ મંડળોને વિસર્જન દરમિયાન પડતી મુશ્કેલીઓ અંગે રજૂઆતો કરવામાં આવી હતી. તેમણે જરૂરી વ્યવસ્થાઓ માટે પણ માંગ કરી હતી. આ રજૂઆતોને ધ્યાનમાં રાખીને ધારાસભ્ય ભરતભાઈ પટેલે જિલ્લા કલેક્ટર અને વલસાડ નગરપાલિકાના ચીફ ઓફિસર સમક્ષ રજૂઆત કરી હતી. તેમણે માંગ કરી હતી કે ગણેશજીની પ્રતિમાના વિસર્જન દરમિયાન કોઈપણ ગણપતિ મંડળને અગવડ ન પડે. વિસર્જન સ્થળે જરૂરી સુવિધા, સુરક્ષા અને વ્યવસ્થા સારી રીતે ઉપલબ્ધ થાય તે માટે યોગ્ય કાર્યવાહી કરવામાં આવે. આ રજૂઆત બાદ સ્થળ પર કામગીરી શરૂ કરવામાં આવી હતી. ધારાસભ્યએ ફરી મુલાકાત લઈને જરૂરી સૂચનો પણ કર્યા હતા.