વેરાવળના સિંધ સમાજે સોમનાથ મહાદેવને ધજા અર્પણ કરી:લાલસાંઈ ફાઉન્ડેશન અને ગુરુનાનક કીર્તન મંડળી દ્વારા ધ્વજારોહણ, શોભાયાત્રામાં મોટી સંખ્યામાં લોકો જોડાયા

પવિત્ર શ્રાવણ માસની ઉજવણી વચ્ચે વેરાવળના સિંધ સમાજે પ્રથમ જ્યોતિર્લિંગ સોમનાથ મહાદેવ પ્રત્યે પોતાની આસ્થા વ્યક્ત કરી. સિંધ સમાજના લાલસાંઈ ફાઉન્ડેશન અને ગુરુનાનક કીર્તન મંડળી દ્વારા સોમનાથ મંદિર ખાતે ધ્વજારોહણ કરવામાં આવ્યું. ધ્વજારોહણના આ પ્રસંગને લઈને સમાજમાં ઘણો ઉત્સાહ જોવા મળ્યો. મંદિર ખાતે ધજા અર્પણ કરતા પહેલાં વાજતે-ગાજતે શોભાયાત્રા કાઢવામાં આવી હતી. ભક્તિમય વાતાવરણમાં યોજાયેલી આ શોભાયાત્રામાં સિંધ સમાજના મોટી સંખ્યામાં લોકો જોડાયા. શોભાયાત્રા દરમિયાન ભક્તિગીતો અને કીર્તનના સૂરથી વાતાવરણ ભક્તિમય બની ગયું હતું. શ્રદ્ધાળુઓએ સોમનાથ મહાદેવના જયઘોષ સાથે પોતાની આસ્થા વ્યક્ત કરી. શોભાયાત્રા પછી સોમનાથ મંદિર પહોંચેલા સમાજના આગેવાનો અને ભક્તોએ વિધિવત્ રીતે ધજા અર્પણ કરી ધ્વજારોહણનો કાર્યક્રમ પૂરો કર્યો. શ્રાવણ માસ ભગવાન શિવની આરાધના માટે ખાસ પવિત્ર મનાય છે. આ પાવન માસમાં સોમનાથ મહાદેવના દર્શન અને પૂજા માટે દેશભરમાંથી શ્રદ્ધાળુઓ આવી રહ્યા છે. ત્યારે સિંધ સમાજે સોમનાથ મહાદેવને ધજા અર્પણ કરીને સામૂહિક ભક્તિ અને શ્રદ્ધાનો સંદેશ આપ્યો. આ પ્રસંગે સિંધ સમાજના આગેવાનો, લાલસાંઈ ફાઉન્ડેશનના સભ્યો, ગુરુનાનક કીર્તન મંડળીના સભ્યો અને મોટી સંખ્યામાં સમાજના લોકો હાજર રહ્યા હતા. આખા કાર્યક્રમ દરમિયાન ‘હર હર મહાદેવ’ના જયઘોષથી સોમનાથ ધામ ગુંજી ઊઠ્યું.