ઝિલીયા ગામે શ્રાવણના અંતિમ સોમવારે લોકમેળો ભરાયો:ઝિલેશ્વર મહાદેવના દર્શન કરવા આસપાસના ગામોમાંથી મોટી સંખ્યામાં ભક્તો ઉમટ્યા

ચાણસ્માના ઝિલીયા ગામે આવેલા સ્વયંભૂ ઝિલેશ્વર મહાદેવ મંદિરે શ્રાવણ મહિનાના અંતિમ સોમવારે લોકમેળો ભરાયો હતો. આ મેળામાં ઝિલીયા ગામ સહિત આસપાસના ગામોમાંથી મોટી સંખ્યામાં શ્રદ્ધાળુઓ ઉમટી પડ્યા હતા. ભક્તોએ શિવજીના દર્શન કર્યા અને મેળાની મજા માણી હતી. ઝિલીયા ગામમાં આવેલું આ ઝિલેશ્વર મહાદેવ મંદિર સ્વયંભૂ છે. અહીં વર્ષ દરમિયાન અલગ અલગ ધાર્મિક કાર્યક્રમો થાય છે. શ્રાવણ મહિનામાં આ મંદિરનો ખાસ મહિમા હોય છે. દર વર્ષે શ્રાવણ માસના સોમવારે અહીં લોકમેળો ભરાય છે. આ વર્ષે પણ શ્રાવણના અંતિમ સોમવારે ભરાયેલા મેળામાં ઝિલીયા અને આસપાસના ગામોના શ્રદ્ધાળુઓ મોટી સંખ્યામાં આવ્યા હતા. મેળામાં બાળકો માટે અલગ અલગ ચકરડીઓ અને રમકડાની દુકાનો હતી. નાસ્તાની દુકાનો પણ લાગી હતી. આનાથી સ્થાનિક લોકોને રોજગાર પણ મળ્યો હતો. શ્રદ્ધાળુઓએ ભગવાન શિવના દર્શન કરીને ધન્યતા અનુભવી હતી.