પારડીમાં પોલીસ જવાનનો હાથ તોડનાર 5 આરોપી જેલહવાલે:હોટલમાં રૂમ બાબતે બબાલ, એક મહિલાને મેડિકલ બેઝ પર જામીન મળ્યા

પારડી તાલુકાના કલસર 2 માઈલ પાસે આવેલી 'મોની વિલા' હોટલમાં રૂમ આપવા બાબતે વિવાદ થયો હતો. આ વિવાદ બાદ બંદોબસ્તમાં પહોંચેલા પારડી પોલીસ સ્ટેશનના એક જવાન પર હુમલો કરી તેનો હાથ તોડી નાખવામાં આવ્યો હતો. આ કેસમાં કોર્ટે 5 આરોપીઓને જેલહવાલે કર્યા છે, જ્યારે એક મહિલા આરોપીને તબીબી કારણોસર જામીન મળ્યા છે. DySP એ. કે. વર્માએ દિવ્ય ભાસ્કર સાથેની વાતચીતમાં જણાવ્યું કે, મોની વિલા હોટલમાં રાત્રે 2 વાગ્યે 4 પુરુષો અને 2 મહિલાઓ રૂમ લેવા આવ્યા હતા. હોટલના વેટરે તેમને અન્ય કોમના લોકો કહીને આઈકાર્ડ માંગ્યા હતા. આ બાબતે બોલાચાલી થઈ અને ગેરસમજ વધી. ગ્રાહકોએ 112 નંબર પર ફોન કરીને પોલીસને બોલાવી. 112ની ટીમ બધાને પારડી પોલીસ સ્ટેશન લઈ આવી. પોલીસ સ્ટેશનમાં વાતચીત દરમિયાન આરોપીઓએ "તમે હોટલવાળા વિરુદ્ધ ફરિયાદ કેમ નથી લેતા?" તેમ કહીને બબાલ શરૂ કરી. ત્યાં હાજર PSI અને પોલીસ જવાનો સાથે આરોપીઓએ જોરદાર માથાકૂટ કરી. આ દરમિયાન ગુસ્સે થયેલા આરોપીઓએ એક પોલીસ જવાન પર હુમલો કર્યો અને તેનો હાથ તોડી નાખ્યો. પોલીસ જવાન પર હુમલો કરવા અને ફરજમાં અડચણ ઊભી કરવા બદલ પારડી પોલીસે તરત ગુનો નોંધ્યો. પોલીસે 4 પુરુષો અને 2 મહિલાઓ સહિત કુલ 6 આરોપીઓની ધરપકડ કરી. બધા આરોપીઓને કોર્ટમાં રજૂ કરાયા. કોર્ટે 5 આરોપીઓને જેલહવાલે કરવાનો આદેશ આપ્યો, જ્યારે એક મહિલા આરોપીને તબીબી કારણોસર જામીન આપ્યા છે.