પાટડીના નાવિયાણી પાસે ટ્રક-બોલેરો અકસ્માતમાં એકનું મોત:એક સગીર ઘાયલ, બોલેરો ચાલકનો મૃતદેહ પતરા કાપીને બહાર કઢાયો

પાટડી તાલુકાના નાવિયાણી ગામ પાસે ટ્રક અને બોલેરો વચ્ચે અકસ્માત થયો હતો. આ ઘટનામાં બોલેરો ચાલકનું મોત થયું હતું, જ્યારે એક સગીર ઘાયલ થયો હતો. દસાડા પોલીસે અકસ્માતે મોતનો ગુનો નોંધી વધુ તપાસ શરૂ કરી છે. અકસ્માત એટલો ગંભીર હતો કે બોલેરો ગાડીનો આગળનો ભાગ સંપૂર્ણપણે ક્ષતિગ્રસ્ત થઈ ગયો હતો. ચાલકનો મૃતદેહ ગાડીના પતરા કાપીને બહાર કાઢવો પડ્યો હતો. આ ઘટના પાટડી-બેચરાજી હાઈવે પર નાવિયાણી ગામ નજીક બની હતી. બોલેરો ચાલકનું ઘટનાસ્થળે જ મોત થયું હતું. ઘાયલ સગીરને શંખલપુરની સરકારી હોસ્પિટલમાં સારવાર માટે દાખલ કરાયો છે. અકસ્માતને કારણે હાઈવે પર લોકો ભેગા થઈ ગયા હતા. અકસ્માતને કારણે હાઈવે પર ટ્રાફિક જામ પણ થયો હતો. પોલીસે તાત્કાલિક ઘટનાસ્થળે પહોંચી ટ્રાફિક હળવો કરાવ્યો હતો. પ્રાથમિક તપાસમાં મૃતક ચાલક પાટણ જિલ્લાના વડાવલી ગામનો હોવાનું જાણવા મળ્યું છે. દસાડા પોલીસે ટ્રેલર ચાલક વિરુદ્ધ ગુનો નોંધી તપાસ હાથ ધરી છે. આ કેસની વધુ તપાસ દસાડાના ઇન્ચાર્જ પીઆઇ વી.આઈ.ખડીયા કરી રહ્યા છે. નોંધનીય છે કે, 9 મહિના પહેલાં પણ આ જ જગ્યાએ હિટ એન્ડ રનની ઘટનામાં એરવાડા ગામના બે સગા ભાઈઓ સહિત ત્રણ યુવકોના મોત થયા હતા. તે યુવકો નોકરીએ જવા નીકળ્યા હતા અને અકસ્માતનો ભોગ બન્યા હતા. સમગ્ર અહેવાલ વાંચવા અહીં ક્લિક કરો