પુણા વિસ્તારમાં ઘરમાં જ ચાલતો હતો દેહ વ્યાપાર:ઈન્ડસ્ટ્રીયલ એરિયા પાસેના મકાનમાં દરોડા, સંચાલક અને ગ્રાહક ઝડપાયા; ડિજિટલ પેમેન્ટથી થતાં હતા વ્યવહારો

સુરત શહેરમાં ગુનાખોરી ડામવા પોલીસ સતત એક્શન મોડમાં છે, ત્યારે પુણા વિસ્તારમાં એક મોટા સેક્સ રેકેટનો પર્દાફાશ થયો છે. નજીકમાં આવેલા ઇન્ડસ્ટ્રીયલ વિસ્તાર અને નાના-મોટા કારખાનાઓની આડમાં અહીંના એક શાંત રહેણાંક વિસ્તારમાં ગેરકાયદેસર દેહવ્યાપારનો ધંધો ધમધમતો હતો. પુણા પોલીસને મળેલી ચોક્કસ બાતમીના આધારે માતૃશક્તિ સોસાયટીના વિભાગ-સીમાં આવેલા મકાન નંબર સી/187 માં અચાનક દરોડા પાડવામાં આવ્યા હતા. આ રેઈડ દરમિયાન પોલીસે દેહવ્યાપારના કાળા કારોબારનો પર્દાફાશ કરી 3 જેટલી મજબૂર મહિલાઓને મુક્ત કરાવી છે. 6 મહિનાથી ભાડાના મકાનમાં ચાલતો હતો ગોરખધંધો પોલીસ તપાસમાં બહાર આવેલી વિગતો અનુસાર, આ ગોરખધંધાનો મુખ્ય સંચાલક બિપીન ઉર્ફે રાજુ પીઠાભાઇ નકુમ (ઉ.વ. 38, મૂળ રહે. ભાવનગર) છે. તેણે માતૃશક્તિ સોસાયટીમાં આ મકાન ભાડે રાખ્યું હતું. છેલ્લા 6 મહિનાથી તે પોતાના આર્થિક ફાયદા માટે બહારથી 3 મહિલાઓને અહીં લાવીને તેમની પાસે દેહ વ્યાપારની પ્રવૃત્તિ કરાવતો હતો. ગ્રાહકો પાસેથી તગડી રકમ વસૂલીને બિપીન પોતાનું કમિશન કાઢી લેતો હતો. આસપાસ રહેતા પરિવારોને શંકા ન જાય તે રીતે આખો નેટવર્ક ચલાવવામાં આવતો હતો. 1 લાખથી વધુનો મુદ્દામાલ જપ્ત, ગ્રાહક પણ ઝડપાયો પુણા પોલીસે ઘટનાસ્થળેથી રોકડા રૂપિયા 3,000, રૂપિયા 1,03,000 ની કિંમતના 3 મોબાઈલ ફોન, એક ફોન પે (PhonePe) સ્કેનર અને મકાનના લાઈટ બિલની નકલ સહિત કુલ રૂપિયા 1,06,000 નો મુદ્દામાલ કબ્જે કર્યો છે. આ ઉપરાંત, પોલીસે રેઈડ દરમિયાન હાજર લસકાણાના રહેવાસી અને વ્યવસાયે બાંધકામ સાથે સંકળાયેલા ગ્રાહકને પણ રંગેહાથ ઝડપી પાડ્યો હતો. ડિજિટલ પેમેન્ટ લેવા માટે રાખવામાં આવેલું સ્કેનર પણ જપ્ત કરવામાં આવ્યું છે. 3 મહિલાઓને નર્કમાંથી મુક્ત કરાવાઈ પોલીસે સંચાલક બિપીન નકુમ અને ગ્રાહક વિરુદ્ધ કાયદેસરનો ગુનો નોંધીને આગળની વધુ તપાસ પુણા પોલીસ સ્ટેશનને સોંપી છે. આ કાર્યવાહીમાં સૌથી મોટી રાહતની વાત એ છે કે, દેહ વ્યાપારની આ બદીમાં ફસાયેલી 3 ભારતીય મહિલાઓને પોલીસે સહીસલામત મુક્ત કરાવી છે. રહેણાંક વિસ્તારમાં ચાલી રહેલી આ અસામાજિક પ્રવૃત્તિ બંધ થતા સ્થાનિક રહીશોએ રાહતનો શ્વાસ લીધો છે.