હળવદમાં કારનો કાચ તોડી ₹1.10 લાખની ચોરી:શોપિંગ સેન્ટર પાસે રાજકોટના વેપારીની કારમાંથી રોકડ ભરેલું પર્સ ચોરાયું; સમગ્ર ઘટના સીસીટીવી કેમેરામાં કેદ

હળવદ શહેરમાં ડો. બાબાસાહેબ આંબેડકર શોપિંગ સેન્ટર પાસે પાર્ક કરેલી કારનો કાચ તોડીને તસ્કરે ગણતરીની મિનિટોમાં ₹1.10 લાખ રોકડા ભરેલા પર્સની ચોરી કરી લીધી હતી. ધોળા દિવસે બનેલી આ ચોરીની સમગ્ર ઘટના નજીકના સીસીટીવી કેમેરામાં કેદ થઈ ગઈ હતી, જેનો વીડિયો સોશિયલ મીડિયા પર વાયરલ થયો છે. બનાવ અંગે વેપારીએ પોલીસને જાણ કરતા હળવદ તાલુકા પોલીસે તસ્કરને ઝડપી પાડવા ચક્રો ગતિમાન કર્યા છે. દવાના ઓર્ડર લેવા આવેલા વેપારી ભોગ બન્યા રાજકોટના રહેવાસી અને જંતુનાશક દવાનો વેપાર કરતા ભરતસિંહ ચૌહાણ અવારનવાર વેપારીઓ પાસેથી ઓર્ડર લેવા માટે હળવદ આવતા હોય છે. ગુરુવારે સવારે આશરે 11:30 વાગ્યે તેઓ હળવદ આવ્યા હતા અને પોતાની કાર ડો. બાબાસાહેબ આંબેડકર શોપિંગ સેન્ટર પાસે પાર્ક કરીને નજીકની દુકાનમાં ઓર્ડર લખાવવા બેઠા હતા. સીટ નીચે મુકેલું ₹1.10 લાખનું પર્સ ચોરાયું વેપારી દુકાનમાં હતા તે દરમિયાન તસ્કરે કારની ડ્રાઈવરની બાજુનો કાચ તોડી નાખ્યો હતો. ત્યારબાદ કારની સીટ નીચે મુકેલું ₹1.10 લાખની રોકડ રકમ ભરેલું પર્સ ચોરીને ગણતરીની મિનિટોમાં ફરાર થઈ ગયો હતો. વેપારી પરત આવ્યા ત્યારે કારનો કાચ તૂટેલો જોઈ ચોરી થઈ હોવાનો ખ્યાલ આવ્યો હતો. સીસીટીવી ફૂટેજના આધારે પોલીસ તપાસ શરુ બનાવ અંગે ભોગ બનનાર વેપારી ભરતસિંહ ચૌહાણે હળવદ તાલુકા પોલીસ સ્ટેશનમાં જાણ કરી હતી. પોલીસે ઘટનાસ્થળના સીસીટીવી ફૂટેજ કબજે કરીને વાયરલ વીડિયોના આધારે ચોરની ઓળખ મેળવવા તથા વિધિવત ફરિયાદ નોંધી આગળની કાર્યવાહી હાથ ધરી છે.