સગીર પુત્રને વાહન ચલાવવા આપવું પિતાને પડ્યું ભારે:જુહાપુરામાં નિવૃત DySPના ઘર પાસે મોટા અવાજે હોર્ન વગાડી હેરાન કરનાર સગીર અને તેના પિતા સામે ફરિયાદ

શહેરમાં જુહાપુરામાં નવરંગ ટેનામેન્ટમાં રહેતા 70 વર્ષીય અર્શદઐયુબ સરવાણી નિવૃત્ત ડીવાયએસપી છે, જેઓ મોરબી એસ.સી.એસ.ટી. સેલમાંથી નાયબ પોલીસ અધિક્ષક તરીકે નિવૃત્ત થયા હતા. 25 જુલાઈ, 2026ના રોજ બપોરે તેઓ અને તેમનો પુત્ર સાહિલ ઘરે હાજર હતા. તે સમયે તેમના પાડોશીનો સગીર પુત્ર એક્ટિવા લઈને તેમના ઘર પાસેથી નીકળ્યો હતો અને કોઈપણ કારણ વગર સતત મોટા અવાજે હોર્ન વગાડીને તેમને હેરાન કર્યા હતા. આ અંગે નિવૃત ડીવાયએસપીએ સગીર અને તેના પિતા સામે ટ્રાફિક પોલીસ સ્ટેશનમાં ફરિયાદ નોંધાવી છે. સગીર અને પિતા સામે કાર્યવાહી આ સગીર વયના પુત્ર પાસે ડ્રાઇવિંગ લાયસન્સ ન હોવા છતાં તેના પિતાએ તેને વાહન ચલાવવા આપ્યું હતું. સગીરની આ ગેરવર્તણૂક અને નિયમભંગ બદલ નિવૃત્ત ડીવાયએસપીએ પડોશી અને તેમના સગીર પુત્ર સામે ‘એમ’ ડિવિઝન ટ્રાફિક પોલીસ સ્ટેશનમાં સત્તાવાર ફરિયાદ નોંધાવી છે.