સિલ્વર ઓક યુનિવર્સિટીમાં 'કલ્પવૃક્ષ 2.0' કોનક્લેવ શરૂ:વિદ્યાર્થીઓની સર્જનાત્મકતા વધારવા માટે વિવિધ સ્પર્ધાઓ અને ભજન ક્લબિંગનું આયોજન

અમદાવાદમાં 10 સપ્ટેમ્બર 2026ના રોજ સિલ્વર ઓક યુનિવર્સિટીમાં મલ્ટિડિસિપ્લિનરી કોનક્લેવ ‘કલ્પવૃક્ષ 2.0’ શરૂ થયો. આ કોનક્લેવનો હેતુ વિદ્યાર્થીઓની સર્જનાત્મકતા, નવીનતા, ટેકનિકલ કુશળતા અને સર્વાંગી પ્રતિભાને પ્રોત્સાહન આપવાનો છે. સવારે 10 વાગ્યે આર્યભટ્ટ હોલ ખાતે ઉદ્ઘાટન સમારોહ યોજાયો હતો. જેમાં ઈસરોના સ્પેસ એપ્લિકેશન્સ સેન્ટર (SAC)ના નિવૃત્ત ડિરેક્ટર અને વૈજ્ઞાનિક શ્રી નિલેશ એમ. દેસાઈ અને નિવૃત્ત વિંગ કમાન્ડર શ્રી ધર્મેન્દ્ર શર્મા મુખ્ય મહેમાન તરીકે હાજર રહ્યા હતા. કોનક્લેવના પહેલા દિવસે યુનિવર્સિટી કેમ્પસમાં અલગ-અલગ જગ્યાએ ટેકનોલોજી, સાયબર સુરક્ષા, ડિઝાઇન, મેનેજમેન્ટ, ફાર્મસી, એવિએશન, ગેમિંગ અને સર્જનાત્મકતાને લગતી ઘણી સ્પર્ધાઓ થઈ હતી. આ સ્પર્ધાઓમાં ટ્રેઝર હન્ટ, નેક્સ્ટજેન ચેટબોટ એરીના, સર્વે ટ્રેઝર હન્ટ, વેલોરન્ટ, વાઇબ ડિઝાઇન ચેલેન્જ, સાયબર ફોરેન્સિક્સ ઇન્વેસ્ટિગેશન, ફિનક્વિડ ગેમ્સ, ઇન્સ્ટાગ્રામેબલ ફાર્મા, ક્રાઇમ સીન ઇન્વેસ્ટિગેશન, એસ.ઓ.યુ. એમ.યુ.એન., ડ્રોન સ્પર્ધા અને વાઇર્ડ વોરિયર્સ જેવી પ્રવૃત્તિઓનો સમાવેશ થાય છે. આ પ્રવૃત્તિઓએ વિદ્યાર્થીઓમાં ખાસ ઉત્સાહ જગાવ્યો હતો. 10 સપ્ટેમ્બરે યોજાયેલી બધી સ્પર્ધાઓમાં કુલ 2,702 વિદ્યાર્થીઓએ ભાગ લીધો હતો. આ કોનક્લેવમાં હરે કૃષ્ણ મૂવમેન્ટ દ્વારા આયોજિત ‘ભજન ક્લબિંગ’ ખાસ આકર્ષણનું કેન્દ્ર બન્યું હતું. સંગીત, ભક્તિ અને આધ્યાત્મિકતાના અનોખા સંગમવાળા આ કાર્યક્રમને વિદ્યાર્થીઓનો સારો પ્રતિસાદ મળ્યો. મુખ્ય મહેમાનોની હાજરી, હરે કૃષ્ણના ભજન ક્લબિંગ અને અલગ-અલગ સ્પર્ધાઓને કારણે આખા કેમ્પસમાં ઉત્સવ જેવું વાતાવરણ હતું. ‘કલ્પવૃક્ષ 2.0’ વિદ્યાર્થીઓને જ્ઞાન સાથે સર્જનાત્મકતા, ટીમવર્ક, સમસ્યા ઉકેલવાની ક્ષમતા અને નવા વિચારો બતાવવા માટે એક ખાસ પ્લેટફોર્મ આપે છે.