સુરતમાં સાસુ-વહુની ચણીયા ટોળી, CCTV:ગ્રાહક બની પળવામાં ચણીયામાં 11 જોડી ઝાંઝરી છૂપાવી, જ્વેલર્સની નજર ચૂકવી 2 લાખના દાગીના ચોરી ફરાર

સુરતના અમરોલીમાં માનસરોવર સર્કલ પાસે શ્રીનાથજી એપાર્ટમેન્ટમાં 'સતનામ જ્વેલર્સ'માં ગ્રાહકના સ્વાંગમાં આવેલી બે મહિલાઓએ વેપારીની નજર ચૂકવી ₹2 લાખની કિંમતની ચાંદીની 11 જોડી ઝાંઝરીની ચોરી કરી હતી. વહુએ ઝાંઝરી આપતા જ સાસુએ ચણીયામાં છુપાવી હતી. આ સમગ્ર ઘટના દુકાનના સીસીટીવીમાં કેદ થઈ હતી. ગ્રાહકના સ્વાંગમાં બે મહિલા જ્વેલર્સની દુકાનમાં ઘૂસી હતી મળતી માહિતી મુજબ, છાપરાભાઠા વિસ્તારમાં રહેતા 61 વર્ષીય વેપારી ઠાકોરભાઈ જીવાભાઈ પારેખની દુકાને તેમનો પુત્ર માર્કેટમાં કામ અર્થે ગયો હતો, ત્યારે બપોરે બે વાગ્યાના સુમારે આશરે 40થી 45 વર્ષની એક મહિલા ચાંદીની ઝાંઝરી લેવા આવી હતી. ત્યારબાદ 60થી 65 વર્ષની અન્ય એક મહિલા પણ દુકાનમાં આવી હતી. પોતે પ્રથમ મહિલાની સાસુ હોવાનું જણાવ્યું હતું. બંને સાસુ-વહુએ ઝાંઝરીના માપ લેવાના બહાને વેપારીને વાતોમાં ભોળવી રાખી નજર ચૂકવીને કુલ 900 ગ્રામ વજન ધરાવતી ચાંદીની 11 જોડી ઝાંઝરી ચોરી રફુચક્કર થઈ ગઈ હતી. સીસીટીવીમાં મહિલા ચોરી કરતી ઝડપાઈ વેપારીના પુત્રે પરત આવીને દાગીનાનો સ્ટોક ચકાસતાં ₹2 લાખની કિંમતનો માલ ગાયબ હોવાનું માલૂમ પડ્યું હતું. સીસીટીવી ફુટેજ ચકાસ્યા બાદ ચોરીની આશંકા સ્પષ્ટ થતાં વેપારી ઠાકોરભાઈ પારેખે અમરોલી પોલીસ સ્ટેશનમાં ફરિયાદ નોંધાવી હતી. હાલ પોલીસે સીસીટીવી ફુટેજના આધારે ગ્રાહકના સ્વાંગમાં આવેલી બંને મહિલા ચોરો સામે ગુનો દાખલ કર્યો છે.