ઊંટડીમાં મેગા મેડિકલ કેમ્પ: 900થી વધુએ લીધો લાભ:ડુંગરી મંડળીના સભાસદોને ₹15 લાખનો અકસ્માત વીમો મળ્યો

વલસાડ તાલુકાના ઊંટડી ગામે ડુંગરી દૂધ ઉત્પાદન મંડળી અને ગ્રામજનોના સંયુક્ત ઉપક્રમે મેગા ફ્રી મેડિકલ હેલ્થ ચેકઅપ કેમ્પનું આયોજન કરવામાં આવ્યું હતું. લોક વિદ્યાલય, ઊંટડી ખાતે યોજાયેલા આ કેમ્પમાં ડુંગરી, ઊંટડી સહિત આસપાસના વિસ્તારોમાંથી 900થી વધુ લોકોએ વિવિધ આરોગ્ય સેવાઓનો લાભ લીધો હતો. આ કેમ્પમાં વિવિધ તબીબી ક્ષેત્રના 15 તબીબોની ટીમે દર્દીઓની તપાસ કરી હતી. ખાસ કરીને આંખોની તપાસ માટે વિશેષ વ્યવસ્થા હતી, જેમાં કુલ 419 આંખના દર્દીઓની તપાસ થઈ. તપાસ બાદ 369 દર્દીઓને ચશ્માંનું વિતરણ કરાયું હતું, જ્યારે 43 દર્દીઓને મોતિયાના ઓપરેશનની જરૂરિયાત જણાતા તેમને આગળની સારવાર માટે માર્ગદર્શન અપાયું. આ મેગા મેડિકલ કેમ્પનું એક મહત્વપૂર્ણ પાસું ડુંગરી દૂધ ઉત્પાદન મંડળી દ્વારા નિયમિત દૂધ ભરતા સભાસદો માટે ₹15 લાખનું અકસ્માત વીમા સુરક્ષા કવચ રહ્યું. મંડળીના પ્રમુખ શ્રી જીનેશ દેસાઈની પહેલથી આ વીમા સુરક્ષા પૂરી પાડવામાં આવી છે. તેનો હેતુ અકસ્માત જેવી આકસ્મિક પરિસ્થિતિમાં સભાસદો અને તેમના પરિવારજનોને આર્થિક સુરક્ષા પૂરી પાડવાનો છે. આ પ્રસંગે વલસાડ જિલ્લા ભાજપ પ્રમુખ હેમંતભાઈ કંસારા, ગુજરાત પ્રદેશ ભાજપના મંત્રી સોનલબેન સોલંકી, જિલ્લા પંચાયત પ્રમુખ હેતલબેન પટેલ, ધારાસભ્ય ભરતભાઈ પટેલ સહિતના મહાનુભાવો ઉપસ્થિત રહ્યા હતા. આ ઉપરાંત જિલ્લા અને તાલુકા પંચાયતના સભ્યો, સંગઠનના હોદ્દેદારો તથા સ્થાનિક આગેવાનો પણ કાર્યક્રમમાં જોડાયા હતા. આ મેડિકલ કેમ્પ દ્વારા એક જ સ્થળે મોટી સંખ્યામાં લોકોને આરોગ્ય તપાસ અને સારવાર અંગે માર્ગદર્શન મળ્યું. આંખના દર્દીઓને ચશ્માંનું વિતરણ અને મોતિયાના દર્દીઓને આગળની સારવાર માટે માર્ગદર્શન આપીને આયોજકોએ આરોગ્ય સેવા ક્ષેત્રે મહત્વપૂર્ણ યોગદાન આપ્યું. સાથે જ, દૂધ ભરતા સભાસદોને ₹15 લાખનું અકસ્માત વીમા કવચ આપીને ડુંગરી દૂધ ઉત્પાદન મંડળીએ સભાસદોના આરોગ્ય સાથે તેમની આર્થિક સુરક્ષાને પણ પ્રાધાન્ય આપ્યું.