વલસાડમાં શ્રાવણી જુગાર પર પોલીસનો દરોડો:રૂરલ પોલીસે 5 મોબાઈલ સહિત 78 હજારના મુદ્દામાલ સાથે જુગારીઓને ઝડપ્યા

વલસાડ રૂરલ પોલીસે શ્રાવણ માસ દરમિયાન જુગાર રમતા પાંચ શખ્સોને ઝડપી પાડ્યા છે. સચોટ બાતમીના આધારે પોલીસે દરોડો પાડી 5 મોબાઈલ ફોન અને રોકડ રકમ સહિત કુલ 78,000 રૂપિયાનો મુદ્દામાલ જપ્ત કર્યો હતો. શ્રાવણ માસમાં જુગારની પ્રવૃત્તિઓ વધતી હોવાથી વલસાડ રૂરલ પોલીસ પેટ્રોલિંગમાં હતી. તે દરમિયાન તેમને ચોક્કસ માહિતી મળી હતી કે કેટલીક જગ્યાઓએ પત્તાનો હાર-જીતનો જુગાર રમાઈ રહ્યો છે. આ બાતમીના આધારે પોલીસે તાત્કાલિક કાર્યવાહી કરી સ્થળ પર દરોડો પાડ્યો હતો. પોલીસ ટીમે જુગાર રમતા શખ્સોને રંગેહાથ ઝડપી પાડ્યા હતા. તેમની પાસેથી દાવ પર લગાડેલી રોકડ રકમ અને પાંચ મોબાઈલ ફોન સહિત કુલ 78,000 રૂપિયાનો મુદ્દામાલ જપ્ત કરવામાં આવ્યો હતો. ઝડપાયેલા તમામ આરોપીઓ સામે પોલીસે જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે. પોલીસે ચેતવણી આપી છે કે શ્રાવણ માસ દરમિયાન જુગાર જેવી અસામાજિક પ્રવૃત્તિઓ ચલાવી લેવામાં આવશે નહીં અને આવા કૃત્યો કરનારાઓ સામે કડક પગલાં લેવામાં આવશે. આ મામલે ઝડપાયેલા આરોપીઓમાં કિરણભાઈ અશોકભાઇ હળપતિ (ઉ.વ. 46), પુનીત પ્રેમબહાદુર સોની (ઉ.વ. 37), વિશાલભાઇ વિજયભાઇ નાયકા (ઉ.વ. 33), ધર્મેશભાઈ અશોકભાઇ નાયકા (ઉ.વ. 34) અને મુકેશભાઇ છીબુભાઇ રાઠોડ (ઉ.વ. 39) નો સમાવેશ થાય છે.