Odisha: મહિલા જેલરે ડિનરનું આમંત્રણ ઠુકરાવ્યું તો હેરાનગતિ શરૂ? સરકારે વરિષ્ઠ IPS અધિકારીને પદ પરથી હટાવ્યા

ઓડિશાના જેલ વિભાગના મહાનિર્દેશક સુશાંત કુમાર નાથ સામે એક મહિલા કર્મચારીનું યૌન ઉત્પીડન કરવા અને તેને હેરાન કરવાનો આરોપ લાગ્યો છે. આ મામલાની નિષ્પક્ષ તપાસ પૂર્ણ ન થાય ત્યાં સુધી વરિષ્ઠ IPS અધિકારીને તેમના પદ પરથી હટાવી દેવામાં આવ્યા છે. IPS અધિકારી પર શું છે આરોપ? ફરિયાદી મહિલા જેલરે આરોપ લગાવ્યો છે કે કુલદીપ રથ જુલાઈ 2025થી તેમને ફોન કરીને અયોગ્ય અને આપત્તિજનક સંદેશા મોકલતો હતો. મહિલાનો દાવો છે કે રથ તેમના પર IPS અધિકારી સુશાંત કુમાર નાથ સાથે રાત્રિભોજન માટે મળવાનું દબાણ કરતો હતો. FIR મુજબ, જુલાઈ 2025માં સુશાંત કુમાર નાથે પીડિતાને કુલદીપ રથને ચૌદ્વાર સર્કલ જેલમાં આવવાની મંજૂરી આપવા કહ્યું હતું. ત્યાંથી રથે મહિલાનો ફોન નંબર મેળવ્યો અને કથિત રીતે અયોગ્ય સંદેશા મોકલવાનું શરૂ કર્યું હતું. 29 ઓગસ્ટ 2025ના રોજ રથે ફોન કરીને પીડિતાને કટકની એક રેસ્ટોરન્ટમાં સુશાંત નાથ સાથે રાત્રિભોજન માટે આમંત્રણ આપ્યું હતું. ત્યારબાદ સપ્ટેમ્બર 2025માં પણ તેમને એક હોટેલમાં રાત્રિભોજનની પાર્ટી માટે બોલાવવામાં આવ્યાં હતાં. કારણ કે IPS અધિકારી તેમની સાથે 'એકાંતમાં મળવા' માગતા હતા. પીડિતાએ બંને વખત આ આમંત્રણ ઠુકરાવી દીધું હતું. મહિલાએ ફરિયાદમાં જણાવ્યું હતું કે, 'મેં અયોગ્ય અંગત આમંત્રણો અને માગણીઓ સ્વીકારવાનો ઇનકાર કર્યો હતો. ત્યારથી જ જેલ વિભાગના DG મને નિશાન બનાવી રહ્યા છે.' કેદીઓના ફરાર થવાના કેસમાં ખોટી રીતે ફસાવવાનો આરોપ પીડિતાએ જણાવ્યું કે ગયા વર્ષે ઓક્ટોબરમાં દુર્ગાપૂજા દરમિયાન ચૌદ્વાર સર્કલ જેલમાંથી બે કાચા કામના કેદીઓ ફરાર થઈ ગયા હતા. ત્યારબાદ તેમની બદલી કાંટાબાંજી સબ-જેલમાં કરવામાં આવી હતી. જોકે, સ્વાસ્થ્ય સંબંધિત સમસ્યાઓને કારણે તેઓ તરત જ નવી જગ્યાએ ફરજ પર હાજર થઈ શક્યાં નહોતાં. ડિસેમ્બર 2025માં ફરજ પર જોડાયા બાદ તેમની તબિયત ફરી બગડી હતી. મહિલાનો આરોપ છે કે ચૌદ્વાર જેલના વરિષ્ઠ અધિક્ષકે દસ્તાવેજોમાં ચેડાં કરીને કેદીઓના ફરાર થવાના કેસમાં તેમને ખોટી રીતે ફસાવ્યાં હતાં. ત્યારબાદ તેમણે જેલ અધિક્ષક સામે પણ ફરિયાદ નોંધાવી હતી, જેની તપાસ ચાલી રહી છે. ફેબ્રુઆરી 2026માં મહિલાને નોકરીમાંથી સસ્પેન્ડ કરવામાં આવ્યાં હતાં અને 6 મહિના સુધી તેમનું જીવનનિર્વાહ ભથ્થું પણ અટકાવી દેવામાં આવ્યું હતું. રાષ્ટ્રીય બાળ અધિકાર સંરક્ષણ આયોગ (NCPCR)ના હસ્તક્ષેપ બાદ 4 ઓગસ્ટ 2026ના રોજ તેમને ભથ્થું આપવામાં આવ્યું હતું. IPS અધિકારીના મિત્ર સામે પણ કેસ દાખલ 1993 બેચના IPS અધિકારી સુશાંત કુમાર નાથ રાજ્યના નવા DGPની પસંદગી માટેની UPSC પ્રક્રિયામાં પણ સામેલ હતા. આ દરમિયાન ઓડિશાના રાજ્યસભા સાંસદ સુજિત કુમારની અધ્યક્ષતાવાળી 'કાર્મિક, જાહેર ફરિયાદ, કાયદા અને ન્યાય' સંબંધિત સંસદીય સ્થાયી સમિતિએ આ મામલાની નોંધ લીધી છે. સમિતિએ 3 નવેમ્બર 2026ના રોજ ગૃહ સચિવ અને આ કેસ સાથે સંકળાયેલા અન્ય અધિકારીઓને હાજર થવા માટે બોલાવ્યા છે. રાજ્યમાં DGP પદના દાવેદારોમાં સામેલ સુશાંત કુમાર નાથ ઉપરાંત તેમના મિત્ર કુલદીપ રથ સામે પણ કેસ નોંધવામાં આવ્યો છે. બંને સામે ભારતીય ન્યાય સંહિતા (BNS) હેઠળ યૌન ઉત્પીડન, ગુનાહિત ધમકી અને સમાન ઇરાદા સાથે જોડાયેલી વિવિધ કલમો હેઠળ ગુનો નોંધાયો છે. ઓડિશા સરકારે નાથની બદલી ગૃહ વિભાગમાં ઓફિસર ઑન સ્પેશિયલ ડ્યૂટી (OSD) તરીકે કરી છે. જ્યારે કટકના ઇન્સ્પેક્ટર વિકાસ સેઠીને આ કેસના તપાસ અધિકારી બનાવવામાં આવ્યા છે.